Urriaren 8an aldarrikapena eta jaia uztartuko dituen egun osoko jaialdia antolatu du Sarek Illunben

Urriaren 8an aldarrikapena eta jaia uztartuko dituen egun osoko jaialdia antolatu du Sarek Illunben

Izan Bidea dinamikaren baitan ezarritako 3.127.326 km-ko erronkari amaiera emango dio Sarek Urriaren 8an Donostian, ondoren jaialdi bat antolatu duelarik; Su Ta Gar, Doctor Deseo, Belako, Zea Mays, Esne Beltza, Dupla, Rotten XIII eta Trikidantzen kontzertuekin, besteak beste. Sarek adierazi duenez “urriaren 8an erronka honi amaiera eman ez ezik, urte luzeetan urruntze-politikaren amaieraren alde aritu diren herritar guztiak batu nahi ditugu, politika honen amaiera gauzatzen ari den honetan, berau egi bihurtzeko emaniko bultzada eskertu eta guztiona den lorpen hau guztiz gauza dadin aldarrikatzeko”

COVIDak mobilizazio handiak egitea eragotzi digu azken bi urteetan, osasuna eta segurtasuna direla eta.

Gaur, osasun-egoerak hobera egin ondoren, SARE sare herritarrak Ilunbera deitu zaituzte gure sare herritarrak 2022an egingo duen mobilizazio handienaren berri emateko.

Urtarrilaren 8an iragarri genuen, Euskal Herrian antolatu genituen mobilizazio ugariak eta gero, urriaren 8an SAREk amaitutzat emango zuela orain dela bi urte ezarritako erronka: 3.127.326 km egitea, hau da, Euskal Herrian dauden biztanle beste km egitea, bizikidetzaren alde, bakearen alde eta euskal presoen eskubideen urraketari amaiera ematearen alde, etxera itzultzeko prozesua egin dezaten.

Askotan esan dugu pertsona askok, leku askotan eta gauza txikiak egiten, mundua alda dezaketela.

Ba, gu hainbat km egiten ari gara, mila eratara. Milaka izan gara helburu hori lortzeko parte hartu dugunok. Gazteak eta adinekoak. Gizonak eta emakumeak. Baina, batez ere, euskal presoei oraindik ere aplikatzen zaien espetxe-politikak eragindako salbuespen-egoera aldatu nahi dute pertsonak.

Helburu horretan parte hartzeko, Izan Bidea aplikazioa jarri genuen martxan, non jendeak egin dituen kilometroak erregistratu baititu. Kilometro horiek SAREren ekimenetan egin dira, edo ekimen indibidualetan; korrika, igerian, bizikletan edo patinetean. Helburua zen euskal gizartearen zati handi bat inplikatzea, eta uste dugu lortu egin dugula.

Beraz, gaur, lehenik eta behin, milaka pertsona horien parte-hartzea eskertu nahi dugu, eta urriaren 8ra arte bidea egiten jarraitzera animatu nahi ditugu, 3 milioi km baino gehiagoko erronka betetzea lortzeko.

Bigarrenik, urriaren 8an, helburua ez da izango soilik erronka hori lortzea. Egun horretan urte luzeetan urruntze-politikaren amaiera eskatu duten pertsona guztiak elkartu nahi ditugu, astiro-astiro politika hori desagertzen ari baita.

Hala ere, nahiz eta bidearen zati bat eginda dugula onartu, esan behar dugu oraindik bide luzea dugula egiteko.

Oraindik ere 90 preso baino gehiago daude etxetik urrun. Espainiako edo Frantziako espetxeetan.

Oraindik ere gehienak bloketatuta daude espetxeko bigarren graduan, eta ezin dute gauzatu etxerako bidea.

Oraindik ere askori ukatu egiten zaie espetxe-baimenak izateko eskubidea.

Labur esanda: salbuespeneko espetxe-politika oraindik ere arau da euskal presoen kasuan.

Horregatik, SAREk euskal gizarte mobilizatzen jarraituko du, eta erakundeei egoera honi amaiera emateko eskatzen jarraituko dugu. Egia da, gure sei urte luzeko ibilbidean, gure helburu nagusia urruntze-politika desagerraraztea izan dela. Eta lortzen ari gara.

Baina ez dugu normalizatutzat joko normalizatuta ez dagoen egoera bat. Hurbilketa urrats handia da, baina, lortu ondoren, etapa gehiago ditugu betetzeko.

Askotan esan dugu, eta esaten jarraituko dugu, oraingo egoera eta aurrean dugun ikuspegi itxaropentsua ez litzatekeela posible izango euskal gizartearen bultzadarik gabe. Pluraltasun ideologikoa eta giza eskubide guztien aldeko apustua oinarri izan dituen bultzada.

Halaber, ez ginateke egongo oraingo egoeran azken hiru urteetan lortutako adostasun politiko eta sindikalik gabe. Ahalegin handia egin da elkargune horiek lortzeko, bakoitzaren ideologia alde batera utzita.

Eta azkenerako utzi ditugu bi aitorpen, baina ez dira garrantzi gutxiagokoak. Alderantziz baizik.

Lehenik eta behin, gaur euskal presoen senideek egunez egun izan duten sufrimendu eta borrokaren balioa aitortu eta gogora ekarri nahi dugu. Milaka eta milaka km egin dituzte, Espainiako eta Frantziako espetxeetara. Eta kostu pertsonala izugarria izan da.

Eta, bigarrenik, indarkeriaren biktima askok erakutsitako enpatia eta bizikidetzaren alde egin duten apustua eta espetxe-politika arrunta ezartzeko egin duten aldarrikapena eskertu eta baloratu nahi ditugu.

Horregatik guztiagatik, urriaren 8an Donostia bizikidetzaren aldeko apustu irmo baten agertokia izango da, “Etxera bidea, gertu” lemapean. Horren bidez, guztion artean lortzen ari garen aldaketa handi hori sustatu nahi dugu.

Zer egingo dugu egun horretan Donostian?

Mobilizazio handi bat izango da. 11:00etan hasiko da, Boulevardean, azken kilometroak egiteko.

Jarraian, manifestazio koloretsu bat egingo dugu, 12:00etan, Pio XII plazatik hasita.

Manifestazioari amaiera emateko, ekitalditxo bat egingo dugu Ilunberen kanpoko aldean, non, komunikatua irakurri ondoren, goizaldera arte luzatuko den musika-jaialdirako prestatutako tabernak eta jateko gunea zabaldu baititugu.

Hala, arratsaldeko lehenengo orduan, 15:30ean, Ilunberen barruan, musika-jaialdia hasiko da. Partaide batzuk zehaztu gabe daude oraindik, baina hauek egongo dira, besteak beste: Su Ta Gar, Doctor Deseo, Belako, Zea Mays, Esne Beltza, Dupla, Rotten XIII eta Trikidantz.

Gune bat egongo da txikienentzat ere, Porrotxekin eta entretenimendurako bestelako jarduera askorekin. Egun borobila izatea nahi dugu. Jarduera ugarirekin. Adin guztietarako. Giro ona. Eta jateko eta edateko aukera, bertan jarriko diren txosnetan.

Aldarrikapen-eguna izango da, baina jai-eguna ere. Bateragarriak baitira. Zalantzarik gabe, halako egun bat antolatzeko, jarduera guztiak bideratzeko, boluntario asko beharko dira, eta prentsaurreko hau baliatu nahi dugu laguntza eman nahi duen jendeari jakinarazteko hilabete batzuk barru boluntario gisa izena emateko aukera zabalduko dugula.


» Sarrerak salgai: https://sare.eus/urriak-8/

Datozen ekimenak

AZKEN BIDEOAK #IZANBIDEA