Herriak

Preso adinduen inguruko ekimena. urriak 27. Sebas eta Joseba etxera. Elgoibar eta Oñatiren arteko bizikleta martxa.

BIDEOA: GOIENA.EUS

Guztioi gertatzen zaigun moduan, espetxealdi luzeetan diren presoak ere, adinean gora doaz eta badaude jada adinez oso aurreratuak dauden eta oraindik espetxean mantentzen dituzten euskal presoak.
Egoera hau bizi duten bi preso ditugu: Sebas Etxaniz Elgoibarren eta Joseba Arregi Oñatin. 76 eta 73 urte dituzte hurrenez hurren. 70 urtetik gorako pertsonak kartzela batean bizitzeak duen larritasuna lau haizetara zabaltzea nahi eta behar dugu.

Joseba Arregi, 1992az geroztik dago espetxean. Hasieran Estatu frantziarrean, 8 urte eta 8 hilabetez, eta 2000. urtean Espainiaratu zuten. Estatu espainiarrean kartzela ezberdinetan egon ondoren, egun, Villena (Alicante III)ko kartzelan aurkitzen da, etxetik 720kmtara. Josebari beste euskal preso batzuei bezela, Frantzian betetako zigorren batuketa aplikatuko baliote kalean behar luke. Orain, 2028ko apirila arte luzatu nahi diote zigorra. 81 urte bete arte nahi dute preso izatea.

Sebasek, 3/4ak beteta izanik, aurtengo uztailean atera beharko litzateke, baina ezartzen dioten salbuespeneko legediarekin, zigor osoa betetzera kondenatuta dago, 2024. urtera arte izatea nahi dutelarik kartzelan. Honek, zera esan nahi du, denon artean espetxe politika hau aldarazten ez badugu, 81urterekin iritsiko dela etxera. Egun, Billabonako kartzelan dago, etxetik 330kmtara.

Legeak berak aurreikusten duen moduan, 70 urtetik gorako presoak baldintzapeko askatasuna eskuratzeko eskubidea dute. Art. 196 R.P. “libertad condicional de los penados que hubiesen cumplido 70 años o los cumplan durante la extinción de su condena”.

Bi presoek, 70 urte baino gehiago izanik kalean beharko lukete, hala zehazten baitu legediak, baina agerian geratzen da, politika hau mendekuan soilik oinarritzen dela, eta egun bizi dugun egoeratik urrun aurkitzen dela.

Preso adinduak, adinak berak dakartzan zailtasunei aurre egin behar diete, non eta espetxean, nola eta salbuespen legediaren neurri zorrotzen pean. Euskal presoen zati handi batek dituen zigorren handitasuna dela eta, adinduak diren presoen kopuruak gora egingo du, batez ere, salbuespen neurriak indarrean jarraitu eta espetxe sistemak ezarritako bidea egiteko aukerak eteten
bazaizkie.

Adinak, espetxean direnei ez ezik senideei ere eragiten die. Adinean gora egiten duten senideek espetxean, ehunka kilometrotara urrundua duten familiartekoa ikusteko aukera galdu dezakete, adinak dakartzak zailtasunak medio distantzia luzeak egiteko eragozpen fisikoak direla eta. Egoera honek, bereziki senideak zigortzen ditu.

Egoera honi aurre egiteko ekimen bateratu bat antolatu dugu urriaren 27rako, Debabarrena eta Debagoiena elkarrekin, herri guztiak bat egin da dinamika hau indartu eta sustengatu behar dugu. Zehazki antolatzea goazena zera da: Elgoibar eta Oñati bizikletaz batuko duen martxa bat. Esan bezala urriaren 27an, igandean, goizeko 10:00etan Elgoibarren hasi eta 13:00etan Oñatin
ekitaldi batekin bukatuko genuke.

Sebas eta Joseba etxean behar ditugu, benetako elkarbizitza eta bakea behar bezala eraiki ahal izateko, egungo errealitatera moldatu behar duen espetxe politika bat behar dugu, eta ez iraganari lotuta dagoen politika bat.

Elkarrekin lanean jarraitu behar dugu, iraganeko loturak hautsi eta etorkizuna
eraikitzeko. Salbuespeneko espetxe politikari ez esaten diogu, eta etorkizunari
bai.

Ordua da! Sebas eta Joseba etxera!
Euskal Presoak Etxera!


Iruñeko Peñak «dispertsioa eta urruntzearekin politikarekin jada amaitu behar da»

Bi urte joan dira Iruñeko hainbat Peñek Euskal Presoek pairatzen duten dispertsioaren kontra azaldu ginenetik eta urte bat nafarroako gizarte zibilak deitutako Orain Presoak dinamikarekin bat egin genuenetik. Zehazki, Iruñeko La Unica, Bullicio Pamplones, Irrintzi, Sanduzelai, San Fermin, Alegria de Iruña, Muthiko Alaiak, Aldapa, Rotxapea, La Jarana eta Armonia Txantreana peñek giza eskubide eta elkarbizitzaren zein bakearen eraikuntzaren aldeko dinamika horri babesa eman genion, orain dela bi urte, peñetan, gure kidegoak babestu zuen dokumentua aintzat hartuta.

Aurten, Anaitasuna Peñako hainbat kide, modu pertsonalean, dinamika eta aldarrikapen honekin bat egin dutela nabarmendu nahi dugu.

Sufrimenduekin amaitzeko bidean gure konpromiso eta ekarpena egin nahi dugu. Zentzu honetan espetxe politika honek sortzen duen sufrikarioarekin amaitzea beharrezkoa dela uste dugu, iaz esan bezala, dispertsioa eta urruntzearekin jada amaitu behar delarik. Orain da momentua. Gizarte zibilaren konpromisoak ahalbideratu du, urratsez urrats, honaino iristea
eta aurrerantzean ere gizarte zibila izan behar da protagonista.

Horregatik, aipatutako Iruñeko peñek, Sanferminei begira eginen dugun ekarpenaren berri eman nahi dizuegu. Gure konpromezua eta Sanferminetan dugun erreferentzialtasuna praktika honekin amaitzeko lagungarria izan daitekela jakitun izanez.

Zehazki, gure pankarta eta lokaletan dispertsioa salatzen jarraituko dugu eta gure bazkidegoaren artean 'Orain Presoak' leloa duten txapak banatuko ditugu. Bazkidegoak jaietan zehar txapa jantzita eramateko.

Egin dezagun konponbidearen aldeko bide hau elkarrekin!

#DispertsioarekinAmaitu
#OrainPresoak

Iruñeko La Unica, Bullicio Pamplones, Irrintzi, Sanduzelai, San Fermin, Alegria de Iruña, Muthiko Alaiak, Aldapa, Rotxapea, La Jarana eta Armonia Txantreana peñak


Nafarroako zonalde ezberdinetan gure dinamikak ugaldu eta sareak hedatuko ditugu Preso diren pertsonen eta euren senideen eskubideen alde

Gaur, hemen batu garenak, Nafarroako herri eta auzo ezberdinetako herritarrak gara, eta nafar jendarteari zuzendu nahi gatzaizkio. Preso diren pertsonen eta euren senideen eskubideak errespetatuak izan daitezen exigitzen jarraitzeko, denon artean presoak etxeratzeko unea dela aldarrikatzeko eta urtetako sufrimenduak atzean utziz konponbidean urratsak emateko sarea zabaltzen joan nahi dugulako gaude hemen. Azken batean, garai berri baten ateak zabaldu direlako. Elkarbizitzarako eta bakerako ateak zabaltzeko nahian gabiltzalako eta auzi honi konponbidea ematen hasteko benetako aukerak ditugulako parez pare.

Sare Herritarra osatzen dugunok, aurrera egin nahi dugu. Ziklo berri honek hala eskatzen duelako. Jendarteak berak, hala eskatzen duelako.

Korapiloak askatzeko garaia da. Presoei ezartzen zaien salbuespen politika eta neurriek, sekula zentzurik izan ez duten arren, orain, existitzeko arrazoi oro galdu dute. Sufrimendu oro sortzea eten eta jendarte honek elkarrekin bakean bizitzeko duen nahia gauzatu dadin presoen auziari aterabidea ematea ezinbestekoa da.

Herri gisa aurrera egiteko, espainiar zein frantziar espetxeetan preso diren euskal herritarrek ere, aparteko legerik aplikatu gabe, euren bidea egiteko aukera behar dute. Guztiok baikara eta guztiok izan behar baitugu herri honen parte. Eta presoak ere, elkarbizitza eta bakearen eraikuntzan ezinbesteko aktibo izan behar dira.

Horregatik euskal presoek jasaten duten salbuespen neurriak behin betikoz amaitu behar dira:

  • Sakabanaketaren amaiera

  • Isolamenduaren amaiera

  • Egungo legedian oinarritutako graduen progresiorako eskubidea: lehenengo graduaren amaiera eta espetxe onurak lortzeko erraztasunak

  • Gaixotasun larri eta sendaezinak dituzten presoen askatasuna

  • 70 urtetik gora dituzten presoen askatasuna, bai eta zigorraren 3/4 eta 2/3 beteak dituzten presoen askatasuna.

  • Bizi osorako zigorrak ezarri eta zigorren luzapena ahalbideratzen duten lege eta neurrien indargabetzea

Sufrimendurik, biktima gehiagorik eta euskal preso eta iheslaririk gabe, elkarbizitza eta bakea oinarri dituen jendarte bat eraikitzearekin amesten dugu guk. Eta horixe da, ziklo berri honen aurrean, Sare Herritarrak bere buruari ezartzen dion helburua. Auzi hau, behin betikoz konpondu behar dugu, gertatutako oro errepika ez dadin bermeak ezarri eta herri hau normalizazio egoera batera eraman.

Gizartearen aktibazioan sakontzen jarraituko dugu. Zaila da urratsak ematea gizartearen bultzadarik gabe. Nafarroan herri eta auzo bakoitzean, eskualde guztietan eragin behar dugu. Erriberan, Baztan, Bortziri, Malerreka, Sakanan, Tafalladean, Larraun eta Leitzaldean, Lizarraldean, Ultzama eta Basaburuan, Zangotzaldean, Ekialdean, Izarbeibarren zein Iruñerrian. Gure dinamikak ugaldu eta sareak hedatuko ditugu, ezberdinen aktibazioan sakonduz eta gizarte zibilaren mobilizazio eta konpromisoa ahalbidetzeko bide berriak sortuz.

Gero eta sare zabal eta anitzagoa gara eta akordioak lortzeko lanean jarraituko dugu, gizarte zibila aktibatuz eta guztien konpromisoa ahalbidetuz, konponbidea oinarri.

Bide honetan, gure indarra elkarrekintza eta batera eginiko lana dira. Norantza horretan jarraituko dugu. Irailetik aurrera Nafarroa osoan hedatuko ditugun ekimenen berri emanen dugu.


'Poltsa bete kantu' ekitaldiak emakume presoek bizi duten zigor bikoiztua salatuko du

Ekainaren 13an, Ostegunean, ‘Poltsa bete kantu’ musika ekitaldia egingo du Sarek Doka antzokian. Egitasmoaren helburua da emakume presoek espetxeetan bizi duten zigor bikoiztua auzitan jartzea. Ekitaldia 19:00etan hasiko da, eta punta puntako hainbat musikarik parte hartuko dute:

Koban taldeak, McOnak taldeko Irati Irizarrek, Niña Coyote eta Chico Tornado taldeko Koldo Soretek, Eraul taldeko Asier Beramendik, Iker Laurobak, Leire Letuk, Urbil Artolak, eta Liher taldeko Lide Hernandok eta Joshka Natkek.

Sarrerak Parte Zaharreko Herria tabernan, Groseko Marruma elkartean eta Antiguako Trikuharri tabernan eros daitezke, 5 euroren truke. Internet bidez ere eros daitezke.

 

>> Erosi sarrerak hemen 


Kepa Arronategiren senideak eramango dute Korrikako lekukoa Gernikan

Osasunaren Naiozarteko Eguna dela eta burutu berri dugun GIZA-KATEA oso jendetsua izan da. Bere bitartez Kepa Arronategi eta larriki dauden gainerako presoak etxeratzea eskatu dugu. Lanean jarraituko dugu Kepa etxean, etxekoekin egon dadin.
Zentzu horretan, jakinarazten dizuegu datorren apirilaren 11an (osteguna) Korrika pasatzen dela Gernika-Lumotik. SARE Gernikak tarte bat izango du lekukoa eramateko eta Keparen senideak eramango dute lekukoa SARE ordezkatuz eta ehunduz. Ekimen honen bidez ere, Kepa etxera hurbiltzea nahiko genuke. Ordutegi eta kokalekua zehazten dutenean antolatzaileak deialdia egingo dugu bertoratzera, nahi izanez gero.


“Orain Jon Gurutz” Dinamika aurkeztu dute Etxarri Aranatzen

Berriki Jaiki Hadi mediku elkarteak jakinarazi duenez, osasun ikuspegitik begiratuta gaitz larriak eta sendaezinak dituzten euskal presoak 21 dira: Tartean dago patologia larriak dituen eta adin nagusikoa den Jon Gurutz Maiza Artola herritarra.

Hau da momentu honetan Jon Gurutzen egoera.

  • 68 urte ditu.

  • Gatazkaren ondorioz 41 urte daramatza herritik urrun.

  • 2007an Frantzian atxilotua. Ia 12 urte daramatza beraz, espetxean.

  • Estatu Frantziarrean oraindik kondena luzea du.

  • Hiru estradizio eskaera eta euro agindu bat ere badu bere kontra.

  • 12 urte hauetan hiru espetxe ezagutu ditu.

  • Momentu honetan Lannemzango espetxean dago, herritik 300km-tara

  • Jon Gurutzek gaitz ugari ditu: ikusmen zorroztasunaren galera, ezkerreko begiko erretina-askatzea, berriki, eta eskuineko begiaren galera haurtzarotik; diabetesa, dislipemia; hipertentsioa eta fibrilazio aurikularra.

  • Patologia horiek eta duen adina ikusita, Igorrek esan bezala, Jaiki Hadi mediku elkarteak gaitz larri eta sendaezinak dituzten euskal presoen zerrendan sartu berri du.

Jon Gurutzen egoeraz jabetuta lan talde bat jarri dugu martxan, eta hortaz, Jon Gurutzen askatasuna eskatzeko dinamika da aurkeztu nahi duguna. Jon Gurutzen egoeraren berri eman eta herriko eragile eta norbanakoak dinamika honen inguruan aktibatzea ditu helburu, aldarrikapen garbi batekin: konponbidean urratsak emateak euskal presoen korapiloa askatzea ekarri behar du eta bide horretan gaixotasun sendaezinak dituzten euskal presoen etxeratzea ezinbestekoa da. 21 preso horiek kalean egon behar dute. Pertsona hauen osasunarekin eta sufrimenduarekin bestelako kalkuluak egitea ankerkeria hutsa besterik ez da.

Konponbidean, giza eskubideen errespetuan eta elkarbizitzan urratsak emateko guztiok behar dugu batera bultza eta norabide horretan “Orain Jon Gurutz, gaixo dauden presoak etxera” dinamikaren aurkezpen honekin, herritarrak hemendik aurrera eginen diren ekimen ezberdinetan parte hartzera gonbidatu nahi ditugu.

Aldez aurretik eskerrik asko!!!

DENOK BATERA PRESOAK ETXERA!


Abenduaren 31an manifestazioa egingo dute Villabonatik Zizurkilera Aiztodoko sei udalen babesarekin

Azken denboran, alde desberdinetatik bakea lortu ahal izateko pausuak ematen joan gara guztion artean. Batzuk lortu ditugu, baina ezin esan dezakegu bidea amaituta dagoenik. Gaur hemen, jendarte oso baten eskaera izango den aldarri bat kalean izateko deialdia luzatu nahi dugu. Orain arte, bakoitza bere lanetan burubelarri egon da, baina guztiok konponbiderako eta bakerako konpromisoak pilatuz eman dugu gure denbora gehiena.

Horregatik, guztiok elkartzeko garaia dela uste dugu, guztiok elkarrekin lan egiteko, gure beharretatik haratago, jendarte oso baten beharra den pausua eraikitzeko garaia da. Guztiok elkarrekin bi estatuei, bai Frantsesari zein Espainiarrari, ORAIN PRESOen garaia dela esateko unea da, horregatik, datorren abenduaren 31an arratsaldeko 18:30tan ORAIN PRESOAK lelopean manifestazio bat antolatuko dugu, Villabonatik Zizurkilera.

Hainbat lagun bilduko gara, Madril eta Parisi esateko bake justu eta iraunkor baten baldintzak ez direla oraindik bete. Esanen diegu prozesua ez dela bukatu gatazka armatuaren amaierarekin. Armagabetzea eta ETAren disoluzioaren ondotik, orain presoen aldia izan behar dela oroitaraziko dugu. “BAKEGINTZA ETA ELKAR BIZITZAREN BIDEAN: ORAIN PRESOAK!”: horra Euskal Herriak, bere aniztasunean, nahi eta behar duen bide orria, bi Estatuei berriro eskatuko zaiena. Esango dugu bakearen bidea alde guztien eginkizuna dela: jendartearena bere aniztasunean, elkarteena, instituzio politiko zein instituzionalena eta noski estatuena. Aktore guztien eginkizuna da, eta naiz eta giltza nagusia Estatuen esku egon, gizarte zibilak ere badu egoera aldatzeko bere eginkizuna. Presoen alde, ORAIN, egin behar dira urratsak: prozesuaren abiadura aldatu beharra dago. Urgentziazko garaian sartuak gara! Presoen auzia konpontzeko unea etorria da! Salbuespen neurriak kendu behar dira, giza eskubide arruntak errespetatzea delako, gaurko egoera politiko berriak eskatzen duelako, eta bake orokor eta integral baten oinarria delako! Eta bihar, marko juridiko berri bat beharko dugu, bake prozesuari egokitua.

Orain arte egin diren alde bakarreko urratsek eskatzen dute erantzuna bakearen dinamika elikatzeko. Gaur eman behar diren pausoak ez emateak balioa kentzen ahal diete atzo egin ziren urratsei… Ezinbestezkoa da konfirmatzea orain arte egin dena, egin behar zela eta ona zela bakearentzat! Bidea, hortik doa. Eta hortik urratu behar dugu iraganetik etorkizunerako trantsizio hori…

Iraganaz ezer baztertu eta ahaztu gabe, egin behar dugu bidea. Indarkeria guztien biktima guztiei zor diegun egia, errespetua eta errekonozimendua. Zor diegu iragana ez errepikatzea, eta, horretarako lan egitea, edozein izanik ere gure arteko ezadostasunak.

Aspaldiko urteetan posible izan ez zen elkar bizitza demokratikoa, azkenean posible ikusten da gure Herrian! Orain arte batu ahal izan ez garenen ariketa kolektiboa izanen da!

Eginbide horrekin, esperantza horrekin, zorroztasun horrekin, guzientzat ona izanen den bakea eraikiko dugu. Egun bakoitzak kontatzen du. Bakoitzaren inplikazioa beharrezkoa da.

Elkar bizitzarako prozesu horretan, ORAIN, PRESOEN etapa izan behar da!
Bakearekin guztiak irabazle baikara: Egin dezagun denak irabazle izanen diren bakea!


Zama doinuz arindu IV elkartasun jaialdia urtarrilaren 13an ospatuko da Etxarri Aranatzen

Laugarren urtez izango da. Prentsa ohar honen bitartez, datorren urtarrilaren 13an Etxarri Aranazko Kultur Etxean eta bi emanalditan (arratsaldeko 17:00 eta 19:30) eginen den “Zama doinuz arindu” kontzertu-ikuskizunaren KARTELA zabaldu nahi dugu. Etxarriko Sarek eta senide eta lagunek antolaturik, berriz ere Euskal Herriko abeslari ezagunek urtetako gatazkak oraindik gainean dugun zama arintzeko aukera emanen digute.

Helburua, euskal presoei apikatzen zaien salbuespenezko legedia salatu eta hortaz ematen diren hainbat eskubide urraketen zama arintzea izango da; eta aldi berean urtetan luzatu den gatazkaren konponbidean urratsak ematearen aldeko mezua zabaltzea.

Azken hiru urtetan bezala kartelarekin oso pozik gaude antolakuntzatik. Berriz ere lehen mailako musikariak dauzkagu gure artean.

Hauek dira “Zama doinuz arindu IV” jaialdian parte hartuko duten gonbidatuak:

1. Juantxo Arakama (GLAUKOMA) + Lil Martin Selektah
2. FERMIN MUGURUZA + Magu-Arri (DESKONTROL)
3. PANTXOA CARRERE
4. KOBAN
5. AKELARRE (Juanpa, Xanet, Xabi)
6. HUNTZA (Josune-Uxue)
7. AFU
8. EXPRAI MARRAZKILARIA
9. ITZIAR ITUÑO

SARRERA: 15€

ALDEZ AURRETIK EROSTEKO:
- Etxarri Aranazko Udaletxeko kultura bulegoan (astelehenetik ostiralera 09:00-13:00)
- On-line: www.etxarriaranatz.eus web gunean
- Etxarri Aranazko Xapatero eta Leku Ona tabernetan


EIBARKO 3. BERAKATZ ZOPA TXAPELKETA

Eibarko SAREk 2016an, EIBARKO 1. BERAKATZ ZOPA TXAPELKETA antolatu zuen #STOP DISPERTSIOA / IBON ETXERA! kanpañaren barruan.

Zoritxarrez gauzak ez dira batere aldatu: Ibon Muñoak kartzelan jarraitzen du, Euskal Herritik oso urrun, CORDOBAn (800kmra) eta salbuespeneko legediaren menpe, 1. graduan, isolamenduan, egunaren 20 ordu ziegan pasatzen ditu, (2. gradua sistematikoki ukatzen diote) eta gainera, bere zigorraren ¾k beteak izanik baldintzapeko askatasunean, bere ETXEAN egoteko eskubidea duenean.

Eta egoera hau, egoera sinestezin hau salatzeko, gure kanpañarekin aurrera jo beste erremediorik ez daukagunez, beste ekimen batzuen artean, azaroaren 17an, 11.30etan, Untzaga plazan egingo den EIBARKO 3. BERAKATZ ZOPA TXAPELKETA antolatu dugu.

Honen berri emanez, eta euren partaidetza ezinbestekoa iruditzen zaigulako, Eibarko elkarte guztietara gutunak bidali ditugu dagoeneko. Aurreko urteetan oso ondo pasatu dugu, giro ezin hobean, eta aurten berdin gertatzea espero dugu.


Orain Presoak Dinamikako aurkezpena Ezkerraldean

Dagoeneko inork ezin uka dezake: konponbiderako, elkarbizitzarako eta bakerako unea da. Pasa den maiatzaren 4an bizitako egun historikoaren ostean, parez pare ireki zaigu hainbeste sufrimendu sortarazi duen ziklo luze honi amaiera emateko aukera, elkarrekin lan eginez, elkarri begiratuz, elkarri entzunez, ditugun adostasunei lehentasuna emanez eta elkarrekin bidea eginez.

Etorkizunari begira jarri nahi dugu, eta horretarako iraganetik datozen oinaze eta min guztiak sendatzea ezinbestekoa da. Bide honetan izan diren eta diren biktima guztiek merezi dute egia, memoria eta erreparazioa. Norabide horretan sakondu behar dugu. Herritar gisa, guztioi dagokigu ardura hau geure egitea, guztiok merezi baitugu elkarbizitzan eta bakean oinarritutako jendarte batean bizitzea.

Oraindik bada, ordea, sufrimendua sortzen jarraitzen duen auzi bat, askatu beharreko korapilo bat. 269 euskal preso daude euren senideengandik ehunka edo milaka kilometrora urrunduak. Espetxean dauden pertsona hauek euren eskubideen jabe izan arren, oraindik ere salbuespen- neurriak ezartzen zaizkie, Espainiako zein Europako legedien aurka doazenak, eta, presoa ez ezik, senideak, bereziki haurrak eta adin nagusiko pertsonak ere zigortzen dituztenak.

Bakean eta adiskidetuta bizi den jendarte batekin amesten dugunok giza eskubideen errespetuak batzen gaitu. Jakin badakigu adiskidetzea prozesu konplexu bezain beharrezkoa dela, urratsez urrats eraikitzen joango dena. Zentzu honetan, egungo espetxe-politika aldatzea ezinbestekotzat jotzen dugu, eta horretarako behar beharrezkoa da guztion bultzada eta konpromisoa.

Lau lehentasun hauek dira, bereziki, lehen bait lehen konpondu beharrekoak:

Urruntzea. Asteburu oroz ehunka senide ehunka kilometro egitera behartzen dituena.

Larriki gaixo dauden presoak. Egun gutxiko bizia geratu aurretik, gaixorik dauden presoek behar bezala artatzeko eskubidea dute, hemen eta orain.

Europako Legediak dioen moduan, bi estatutako zigorren batuketaren aplikazioa.

Lehen Graduen aldaketa. Euskal presoek, lehen graduan betetzen dute zigorraren %100, eta hori legearen kontra doa.

Espetxe-politika hau iraganean kateatuta dago eta ez-ohiko lege batean oinarritzen da. Guk etorkizunera begira jartzeko garaia dela uste dugu. Gure ondorengoentzat guri aurrekoek utzi zigutena baino etorkizun hobea eraikitzeko aukera dugu esku artean. ETA desagertu den honetan, ez dugu sufrimendu gehiago sortzen duen politikarik nahi.

Korapiloak askatzeko unea da, elkarbizitzarako unea. Urteetan sortutako gizarte-arrakalak elkarrekin sendatzeko unea. Batu ezin izan garenok batzeko unea da. Orain presoen auzia konpontzeko unea da.

Gaur hemen batu garenok ORAIN PRESOAK dinamikari babesa ematen diogun Ezkerraldeko herritarrak gara. Guztioi dei egiten dizuegu, gure ametsarekin bat egiten baduzue, hurrengo asteetan antolatu diren mobilizazioetan parte hartzeko. Lehena hemen bertan izango da, Sestaon, irailaren 29an, larunbata, 13:30ean Kasko plazatik abiatuta. Halaber, urriaren 20an Donostiako kaleak txiki uztera animatzen zaituztegu.