sarenaiz

Haur motxiladunen aldeko bi mobilizazio handi iragarri ditu Sare Herritarrak: abenduaren 28an eta urtarrilaren 19an biak Donostian

Pare bat urte igaro dira motxiladun haurren egoera argitara eman genuenetik. Bi urte aita, ama edo biak espetxean dituzten haurrek bizi duten egoera salatzen hasi ginenetik. 30 urte bete dira ordea espainiar Estatuak urrunketa politika ezarri zuenetik, euskal presoen senide eta lagunek ehunka eta milaka kilometro egitera eta errepidean bizitza jokatzera zigortu zituenetik. Zigor honen aurpegi ilunena da motxiladun haurrek jasaten dutena.

Denbora daramagu bada, motxiladun umeek bizi duten sufrikario egoera hau amaitzeko eskatzen, gogoraraziz oraindik ere 105 direla aita, ama edo biak espetxean, urrunduak dituzten umeak; horietatik bost kartzelan daude beraien ama edo gurasoekin. Lau Picassenteko kartzelan Balentzian, eta bat Madrilgo Aranjuezeko kartzelan.

Haur jaioberriak, kartzelan hiru urte bitarte egoten dira, eta hiru urteak betetzean ama edo gurasoengandik bananduak izaten dira. Honek, bi eratara eragiten dio haurrari; batetik, gurasoengandik eta ordurarte ezagutu duen bizitzatik aldendua izateak dakarren kalte psikologikoa. Bestetik, haurrak banaketa jasateaz gain, datozen urteetan gurasoak ikusteko egin beharko dituen kilometroak eta honek dakarren guztia.

Hori da, Xuak datorren urtarrilean biziko duen egoera. Xuak hiru urte beteko ditu urtarrilaren 19an, eta horrek, gurasoak Balentzian utzi eta amonarekin Usurbilera etorri beharko duela esan nahi du. Ia 600kmtara. Asteburuetan beraz, gurasoak ikusteko 600km joan eta 600km etorri egin beharko ditu, guztira, 1200km ordu gutxi batzuk gurasoekin egon ahal izateko.

Xua bezala dabiltzan 105 motxiladun haurrek, kilometro pila bat egin behar dituzte asteburuetan, eskola galduz, etxeko lanak egiteko denborarik gabe, futbol edo pelota partiduak galduz, lagunen urtebetetze ospakizun jaietan ezin egonez…

Egoera honekin amaitzea denon ardura dela uste dugu, guztiok baikara jendarte honen eta gure ondorengoen etorkizuna eraikiko dugunak. Azken hilabete eta urteetan eraiki ditugun adostasun bai politiko, sindikal zein sozialei jarraiki, urte garrantzitsu hau kalean, motxiladun haurren auziari aterabidea emateko aldarrikapenarekin, amaitu nahi dugu. Eta jendarte osoari dei egiten diogu gurekin batera, datorren abenduaren 28an 12:00etan Donostiako Bulebarretik abiatuko den Kalejiran parte hartzera.

Honekin batera, urteari hasiera emanez, urtarrilaren 11ean Bilboko eta Baionako kaleak beteko dituen manifestaziorako deia ere luzatu nahi dugu;

2020a motxiladun haurren auziari aterabidea ematen diogun urtea izan dadin. 2020. urtea espetxe politika aldatuko dugun urtea izan dadin. Horregatik, ekitaldi baten berri ere eman nahi dizuegu gaurkoan; Urtarrilaren 19an, Xuaren urtebetetze egunean, Donostiako Atano Pilotalekuan goizeko 11:30tan Porrotxekin batera egingo dugun Motxilak Gora! Ekitaldia aurkeztu nahi dugu.

Motxiladun haur guztiak gurasoekin etxean egon daitezen, motxilak gora!


Sare Herritarraren oharra hurrengo larunbatean Iruñean egingo den manifestazioa harira.

Datorren abenduaren 21ean arratsaldeko 18:00etan Iruñeko autobus geltoki zaharretik abiatuta “Atera bidera, presoak etxera!” MANIFESTAZIOA antolatu du Sare herritarrak.

Mobilizazio honekin egun indarrean dagoen eta hainbat eskubide urratzen dituen salbuespenezko espetxe politikaren indargabetzea aldarrikatu nahi dugu, elkarbizitzan eta benetako bakean urratsak emateko presoen korapiloa askatzea  beharrezkoa dela azpimarratuz. Gaixo larrien etxeratzea, urrunketa politikaren amaiera, motxiladun haurren eskubideen aldarrikapena edo eta emakume presoek bizi duten egoera salatuko dugu abenduaren 21ean Iruñeko kaleetan.

Gaur egun 36 dira preso Nafarrak, hauen %80 lehenengo graduan dago, espetxean dagoen erregimenik gogorrean.

35 urrunduak Espainiako eta Frantziako estatuetan, 1 espetxe arinduan (Etxean preso). Horietatik 4 Larriki gaixo daude, 4 emakumeak dira, bizi baldintza okerragoetan. Ama, aita edo biak espetxean dituzten haurrak 11 dira (Motxiladun umeak) eta horietako bat espetxean dago bere amarekin.

Urte luze hauetan bi izan dira urrunketak eragindako biktimak. Sara Fernandez eta Karmele Solaguren.

Manifestazioa 18:00etan abiatuko da autobus geltoki zaharretik eta lau gune izango ditu.

1. Vianako Printzearen plazan Nafarroako Presoen senide eta lagunei data berezi hauetan keinu bat egingo diegu. Ondoren Manifestaziora batuko dira.
2. Merindadeen Plazan Performance baten bidez urrunketaren ondorio diren kotxe istripuak irudikatuko dira.
3. Karlos III.a etorbidean (entzierroaren oroitarriaren ondoan) larriki gaixo dauden presoen egoera salatuko da.
4. Txapitela kalearen hasieran espetxean daude emakumeak bizi duten muturreko egoera salatuko da.

Manifestazioa Iruñeko udal plazan amaituko da. 

Bestetik gogoratu nahi dugu LARRIKI GAIXO DAUDEN PRESOEN egoera salatzeko ekimen ugari egingo direla asteburu honetan eta hurrengoan Nafarroan zehar.

Datak:
Abenduak 19 Iruñeko alde zaharrean 17:30 Zezen plazatik abiatuta esku orrien banaketa.
Abenduak 19 Antsoaingo Kaputxinoen biribilgunean 19:30 elkarretaratzea.
Abenduak 20 Iruñeko Sarasate pasealekuan 20:00 elkarretaratzea.
Abenduak 22 Lesaka beheko plazan 13:30 mobilizazioa.
Abenduak 26 Donibane auzoko Azuelo plazako biribilgunean 19:30 elkarretaratzea.
Abenduak 27 Sakanako Manifestazioa – Etxarri Aranatz – 19:00 Plazan.


Gaur Gipuzkoako Batzar Nagusietan, Xua gurasoekin etxera mozioa landu da

Urteak daramatzagu giza eskubideen inguruko defentsa egiten, horregatik, ez da batzorde honetan parte hartzen dugun lehen aldia. Gai ezberdinek ekarri gaituzte hona; azkenengoz larriki gaixo dauden Jagoba edo Ibonen kasuek adibidez, eta oraindik kasu horiek bere horretan mantentzen diren arren, gaur hona Xuaren egoerak ekarri gaitu.

Xuak 3 urte beteko ditu datorren urtarrilaren 19an. Xua Balentziako Picassenteko kartzelan dago bere aita eta amarekin, Usurbildik 550 kmtara. Espainiar legediari jarraiki, hiru urte betetzean bere gurasoengandik banatu eta amonarekin etorriko da Usurbilera. Honek esan nahi du, soilik hiru urterekin, bere aita, ama edo biak ikusteko asteburuetan 550km joan eta 550km etorri egin beharko dituela, hau da, 1100 km bere gurasoekin egoteko. Baina Xua ez da egoera honetan dagoen haur bakarra, Picassenten beste hiru ume aurkitzen dira egoera antzekoan, eta beste bat Madrilgo Aranjuezen. Guztira egun, 105 motxiladun haur daude.

Egoera honen berri duela bi urte eta erdi inguru eman genuen, eta orain badakigu bizi duten sufrikarioak zer nolako arazo eta hutsune uzten dituen. Guk, egoera honekin amaitu behar dela uste dugu, eta hori legeari jarraiki egin daitekeela. Zergatik ezin dira beraien etxeetatik gertuen dagoen kartzelan egon aita eta ama? Zergatik egin behar ditugu horrenbeste kilometro? Horiek dira 5, 6 edo 10 urteko haurrek egiten dituzten galderak. Eta baita guk egiten ditugunak ere; zergatik? Eta erantzun bakarra datorkigu burura, mendekua.

Eskatzen duguna, ez da legea gainditzea, kontrakoa, Espainiar legedia bera betetzea baizik. Eta hori guztion ardura dela uste dugu.

Argi dugu azken urte eta hilabeteetan euskal jendarteak aurrera pauso handiak eman dituela, eta gai honekiko kontsentsu zabalak eraiki ditugula, baita arlo sindikal eta politikoan ere, eta datorren urtarrilaren 8an eztabaidatuko den eta hemen zaudeten indar politiko guztien (PP izan ezik) babesa duen mozio hau onartzea ere bide honetan beste pauso bat izatea nahi dugu. Bide honetan elkarrekin sakontzen jarraitzea espero dugu.


Larriki gaixo diren presoen inguruko hitzaldia Gasteizko Unibertsitatean

Sarek, Gasteizko unibertsitatean larriki gaixo diren presoen inguruan antolatutako hitzaldiaren baitan sortutako polemika dela eta hurrengo irakurketa egin du hitzaldiari hasiera eman aurretik:

Hitzaldiari hasiera eman aurretik, hainbat argipen egin nahi ditugu:

  • Gaur,Giza Eskubideen Nazioarteko eguna den honetan,euskal presoei ukatzen zaien osasunerako eta bizitzarako eskubidea lantzeko hitzaldi bat eskaintzera goaz. Euskal presoek, gainontzekoen moduan, etxean, euren senideen babesarekin eta konfiantzazko medikuarekin artatuak izateko eskubidea dute, eta gaur gaurkoz, eskubide hori ukatua zaie salbuespeneko legedia deritzona dela eta. Horixe, ez bestelakorik, da gaurko hitzaldian landuko dena.
  • Sarek, lanean daramatzan bost urte hauetan, helburu berari ekin dio; urteetako sufrimenduari, minari eta giza eskubideen urraketari irtenbidea eman eta elkarbizitzarako oinarriak ezartzeko lan egiteari. Bide honetan, biktima guztiekiko errespetua erakutsi dugu beti, eta hala egiten jarraitzen dugu.
  • Ibilbide honen baitan, Sarek, sekula ez dio inorekin hitz egiteari, elkartzeari, entzuteari uko egin, ezta ere, inoren hitza isiltzeko erabakirik hartu. Sarek parte hartu duen eremuetan edota Sarek berak antolatutakoetan ahots anitzak izan dira beti, ETAko zein bestelako indarkerien biktimen ahotsa, Estatu funtzionari izan direnena, espetxea ezagutu duten senide eta pertsonena eta noski, giza eskubideak urratuak izan zaizkien horiena, beste askoren artean. Ahots anitz eta zabal horiei gauza bakarra eskatu izan diegu beti; besteekiko errespetua.
  • Kontziente baikara,oraindik orain,zauri gehiegi daudela zabalduak. Horiek sendatzeak ordea ezin du inor bazterrean laga. Empatia eta elkar-ulertze ariketa da benetako elkarbizitza eta bakea eraikitzeko bide bakarra. Eta horretarako, elkar entzun, bata zein bestaren minak onartu eta errealitate eta sufrimendu asko eta askotarikoak direnaren jabedun egin behar gara.
  • Konbentzituak gaude, garai berri baten aurrean aurkitzen garela. Hala erakusten duten azken urteetan eman diren urratsek; presoek sortutako minaren inguruan eginiko adierazpenek eta legeak ezarritako bideak jarraitzeko hartutako erabakiak, ETAren desegiteak, maila instituzional, politiko, sindikal eta sozialean lortutako adostasunak edota hainbat udalerri eta espazio irekietan biktimen arloan eman diren elkarbizitzarako pausoak aukera berriak zabaldu dituzte gure herriarentzat. Elkarbizitzarako eta bakerako ateak zabaltzen ari gara.
  • Zentzu honetan, egun oraindik espetxean diren eta euren eskubideak urratuak zaizkien 21 larriki gaixo diren presoen inguruan antolatutako hitzaldi honen gaineko boikot deialdia, garatu nahi dugun bide horren aurkakoa dela deritzogu. Batetik, Jose Ramón Lopez de Abetxukok, bere ekinbideagatik epaitegiek ezarritako zigorra bere osotasunean betea duelako eta egun gizon askea delako, eta dagozkion eskubide guztien jabedun. Bestetik, gaur hemen partekatuko duena larriki gaixo egon den preso baten bizipenak izango direlako, ez besterik. Zentzu honetan, boikot deialdi hau adierazpen askatasuna ukatzeko modu larria dela deritzogu. Eta Sarek, giza eskubideen defentsan aritzen den mugimendu gisa, ez du halako urraketarekin bat egingo. Hori hala, hitzaldia bere horretan mantentzea erabaki dugu.

¡Necesitamos ayuda en la defensa de los derechos humanos!

Si quieres tomar parte en la red y realizar una aportación económica, te invitamos a ser SOCIX, a ser Sare

Ser Sare


Giza Eskubideen Nazioarteko Egunaren baitan, Ginebran izango gara, Euskal Herriko hainbat eragileren ordezkaritzan, Kataluniar herriko kideekin batera

Abendua 10, Giza Eskubideen Nazioarteko Egunaren baitan, Ginebran izango gara, Euskal Herriko hainbat eragileren ordezkaritzan, Kataluniar herriko kideekin batera, duela hainbat hilabete, NBEaren Giza Eskubideen Kontseiluan aurkeztu genituen txostenen harira egingo den agerraldian.

NBEko Giza Eskubideen Kontseiluan egin ohi den aldizkako azterketa unibertsalak, NBE osatzen duten 193 herrialdeetan giza eskubideen errespetua hobetzea du helburu. Bost urteren tartean, herrialde guztiek azterketa hau igaro behar izaten dute. Urtero, 40 Estatuinguru aztertu ohi dituzte. Aurtengoan, Estatu espainiarrari dagokio. NBEko Giza Eskubideen Kontseiluak aztertuko du eta hori hala, Euskal Herriko bost eragilek (Sare Herritarrak, Etxerat Elkarteak, Eskubideak Euskal Herriko Abokatuen Elkartea, ELEAK-Libre Mugimendua eta Giza eskubideen Euskal Herriko Behatokia) hainbat alegazio aurkeztu ditugu.

Alegazio guzti hauek ideia berberaren baitan laburtu genitzake: egun, ETA desagertu ostean ere, Estatu espainiarrak bere horretan mantentzen duen lege antiterroristaren baitan eraikitako salbuespen egoerak ekarritako ekintza polizial, penal eta espetxe politikari begirakoak dakartzan giza eskubideen urraketa larriak.

Gure alegazioetan:
Euskal presoek egun oraindik jasaten duten salbuespeneko espetxe politika eta honen ondorio diren giza eskubideen urraketa larriak jaso ditugu txostenean; urruntze politika, gaixo larrien espetxealdia edota zigorren batuketa (beste Estatu batean akusazio beraren baitan bestetako espetxealdia aintzat hartzea) ezaren ondoriozko zigor bikoitzen aplikazioa.
Euskal presoen senideek jasaten duten urraketa, baita arriskua ere. Gogoraraziz 16 direla jada errepidean, euren senidea ikusteko ehundaka eta milaka kilometro egitera behartuak, bizia galdu duten pertsonak.
“Altsasuko auzia” salatu nahi izan dugu; terrorismo akusaziopean, izugarrizko neurrigabekeria judizial eta penala jasan duten gazteen kasua, aurrez aipatutako salbuespen egoera horren adibide garbia delarik.
Hiritarren Babesari erantzun asmo dion 4/2015 Lege Organikoaren aplikazioaren gaineko kezka adierazi dugu, abusu polizialaren hazkundea, baita elkartzeko, manifestatzeko eta prentsarako askatasuna gisako eskubideen gaineko urratzea ere.

Azkenik, giza eskubideen defentsan lan egiten dutenen eta preso diren pertsonei babes profesionala (defentsa juridikoa, babes psikologikoa…) eta elkartasun adierazpena egin dieten pertsonen aurkako jazarpena salatu dugu. Pertsona hauen jarduera publikoa, gardena eta baketsua izan da ere, terrorismo ekintzen akusazioa jasan baitute.

Alegazio hauek oinarri, beraz, bihar Ginebran izango gara espainiar Estatuak Euskal Herrian urratzen dituen giza eskubideak errespetarazteko eskatuz.


SAREk mezu bakarra helarazi nahi die Euskal Herriko indar politikoei: ORAIN DA GARAIA!

2019ko azaroaren 10eko hauteskundeetako emaitzek eta, bereziki, PSOE-UNIDAS PODEMOS alderdien arteko koalizio-gobernuaren proiektuak aukera eskaintzen du indar aurrerakoi eta subiranisten arteko akordio zabala lortzeko, betiere benetako aldaketarako agenda beteko duten aldarrikapen sozialak eta nazionalak oinarri hartuta.

SAREk mezu bakarra helarazi nahi die Euskal Herriko indar politikoei: ORAIN DA GARAIA!!

Orain jarri behar dute EAEko eta Nafarroako euskal agendek leku NABARMENEAN espetxe-politika aldatzeko aldarrikapena, euskal diputatuek edozein akordio babesteko edo abstentziora jotzeko sine qua non baldintza gisa. Politika horrek oinarri sinple bat, baina, aldi berean, oso garrantzitsua izan behar du, GIZA ESKUBIDEAK, eta euskal presoei aplikatzen zaien salbuespen-araubideari amaiera ematea ekarri behar du.

Gai hau Estatuaren agendan sartu behar da. Salbuespen-politikaren ordez, espetxea humanizatu egin behar da. Sakabanaketa orain dela hogeita hamar urte baino gehiago hasi zen. Askatasuna kentzeko zigor gogorrei, urruntzearen zigorra eransten zaie, eta zigor horrek presoei eragiten die, baina eragina gogorragoa da epaituak eta zigortuak izan ez diren senideen kasuan. Hala, zuzenbideko estatua mendeku-estatua bihurtu da, eta horrek balioa kentzen dio. Hau da, oraindik indarrean dagoen «Talioaren legera» itzuli dira, ETA erakundearen indarkeria desagertu zenetik ia 10 urte pasatu ondoren, eta erakundea desegin zenetik urte bat baino gehiago pasatu eta gero.

Ez da ulertzen indarkeria maila gorenean zegoen uneetan bezain krudela izatea orain espetxe-politika. Ez da ulertzen ere, sakabanaketaren xedea izanda militanteei eta senideei presioa egitea ETA desagerrarazteko, oraindik ere sakabanaketari eustea ETA 2018ko maiatzean desegin ondoren.

Preso dagoen senidea 40 minutuz ikusi ahal izateko, 1.000 edo 2.000 kilometro egin behar izatea gizatasun-irizpideen barruan sartzen da, ala?

Gaixotasun larriak dituzten presoak espetxean mantentzea, edo hiltzeko denbora gutxi falta zainean baino ez askatzea, duela gutxi hil den José Ángel Otxoa de Eriberen kasuan bezala, justizia-irizpideetan oinarrituta dago, ala?

Eta, pertsona hauek salbuespen-erregimen bat aplikatzea, biziarteko espetxealdi ezkutua ezarrita, legearekiko ekitate- eta berdintasun-irizpideen edo gizarteratzeko irizpideen araberakoa da, ala?

Egoera honek ez dio soilik Euskal Herriari eragiten. Errepresioak gogor eragin dio Kataluniari ere, hango erakundeei eta ordezkari politiko eta sozialei. Gure erabateko elkartasuna helarazi nahi diegu. Are gehiago. Agenda judizialak eta espetxe-agendak bide eman behar dute Kataluniako aldaketaren aldeko indarrekin akordio zabala lortzeko.

EAEko eta Nafarroako erakundeetan behin eta berriro aldarrikapen hau babestu duten euskal alderdi politikoei, hau da, EAJ/PNV, EH BILDU, PSE, PSN, ELKARREKIN PODEMOS, GEROA BAI eta IZQUIERDA – EZKERRAri hau adierazi nahi diegu:

1.- Gure aitortza eta esker ona helarazi nahi dizkiegu, Gasteizko eta Iruñeko parlamentuetan, lurralde historikoetako Batzar Nagusietan eta udal askotan, urruntze-politikari amaiera ematearen alde, gaixotasun larriak dituzten presoen askatasunaren alde, gradu-aldaketaren kudeaketa normalizatuaren alde edo espetxeen arloko eskumena transferitzearen alde sustatu dituzten erabaki eta ebazpen guztiengatik.

2.- Halaber, erakundeetan erakutsitako konpromiso horretan oinarrituta, eskatu nahi dizuegu erabaki eta ebazpen horiek estatuko gobernu berria osatzeko negoziazioan islatzeko. Lortutako akordioak aktibatzeko eta Euskal Herrian onartu izan denari balioa emateko unea da, orain arte testigantzazkoak izatera mugatu diren erabaki garrantzitsu horiek HELBURU SAIHETSEZIN ETA ATZERAEZIN honen aurkezpen-txartela izan daitezen.

Euskal gizarteak aldarrikapen honi ematen dio babesa erakusteko unea da; indarkeriari eta haren ondorioei amaiera emateko prozesua ixteko unea da.

Etorkizuneko belaunaldiek ez dezatela aukerarik izan guri ezer leporatzeko gure erantzukizunak alde batera utzi ditugulako, edo aukerak ez ditugulako aprobetxatu. Gure ardura da, gizarte zibilarena eta Gorte Nagusietan gure ordezkari politiko direnena, gorrotoaren, sufrimenduaren eta mendekuaren atea erabat ixtea edo, gutxienez, apur bat ixtea, gaurko eta etorkizuneko bakea eta bizikidetza eraikitzeko orain dugun aukera apartaz baliatuta.

EZ BADA ORAIN, NOIZ?


Urtarrilak 11eko manifestaziorako “motorrak berotzeko” mobilizazioak deitu ditu Sarek, Gabonen testuinguruan, lau hiriburuetan.

Mobilizazio hauek “oinarrizko aldarriak zabaldu” eta “salbuespeneko espetxe politika, behin betikoz” bertan behera geratzeko unea dela adierazteko bidea izango dira. Gaixo larrien etxeratzea, urrunketa politikaren amaiera, motxiladun haurren eskubideak aldarrikatuko dute eta euskal emakume presoek bizi duten egoera salatuko dute abenduaren 21, 27 eta 28an Gasteiz, Iruñea, Bilbo eta Donostian.

Gaurko agerraldi hau, abenduko bigarren hamabostaldian, gabonen testuinguruan, Araba, Bizkaia, Gipuzkoa eta Nafarroako hiriburuetan antolatu ditugun mobilizazioen berri emateko deitu dugu, eta noski, herritarrei parte hartzeko deia luzatzeko.

Dakizuen moduan, datorren urtarrilaren 11n, Atera Bidera Orain Presoak lelopean, Bilboko kaleak salbuespeneko espetxe politika honekin amaitzeko ordua dela adierazten duten aldarrikapenez betetzeko asmoa dugu. Urtero egin ohi dugun moduan, urtarrileko manifestaziorako lanketaren baitan, Gabonak une garrantzitsutzat ditugu, sendiarekin eta lagunekin batzeko egunak izaten diren hauek, ehunka eta milaka kilometrotara dauden presoen hutsunea areagotzea baitakarte. Hutsune honi, gainera, ondorengo salbuespeneko errealitatea aintzat hartuta egin behar izango diete aurre 200dik gora euskal presoen senide eta lagunek:

Urrunketa politika, zeinaren ondorioz, oraindik ere 142 diren 600 eta 1.100 km. urrunduak daude presoak eta beste 42, 590-400 km artean. Ahaztu gabe 16 direla jada politika honen ondorioz istripuetan hil diren senideak.
Emakumeen kasuan, urrunketaz gain, bakartze egoerari ere aurre egin behar diote. Espainiar estatuan dauden 25 euskal emakume presoetatik, 12 bakartuta daude, kiderik gabe.

Horietatik bost euren seme-alabarekin daude espetxean. Lau Picassenten (Valentzian) eta bat, Beatriz Etxeberria, Aranjuezen haurrarekin bakartua.

Nabarmentzekoa ere Xuaren kasua. Xua bere ama Olatzekin dago espetxean, baina urtarrilaren 19an hiru urte beteko ditu eta, ondorioz, ama eta aitagandik bereizia izango da.

Xua moduan, beste 103 (guztira 104) motxiladun haur daude ama, aita edo biak espetxean dituztela igaro beharko dituztela beste behin ere gabonak.

Azkenik, ezin aipatu gabe utzi, larriki gaixo diren 21 presoak. 21 familia, bihotza uzkurtuta, ospakizunen erdian, gaixo eta urrun duten senidea ondo egongo ote den euren buruei galdezka.

Egoera honen aurrean, aurten, Gabonen testuinguruan, lau hiriburuetan mobilizazioak antolatzea erabaki dugu; motxiladun haurrek gurasoekin hazteko duten eskubidea aldarrikatu eta Xua ama eta aitarekin etxeratzeko eskatzeko, larriki gaixo diren presoak jasaten ari diren heriotza zigorra salatzeko; espetxean bakartuak diren emakume presoak batzeko deia egiteko, eta ezohikoa den espetxe politika honekin behin betikoz amaitu behar dela exijitzeko.

Aldarri hauek oinarri, espetxe politika aldatzeko beharra da mobilizazio hauetan islatu asmo duguna eta, horretarako, ezinbestekoa dela uste dugu azken urteetan lortu dugun aniztasuna eta jendarte zein instituzio mailako adostasunak bidera atera eta aktibatzea. Datozen urteetan espainiar estatuaren nondik norakoak zuzenduko dituen Gobernu berria osatze lanetan ari den honetan, behar beharrezkoa da euskal jendartearen gehiengoak babesten dituen aldarriak kalean, era aktiboan erakustea. Elkarbizitzarako eta bakerako hain beharrezko ditugun aldaketa hauek aintzat hartu eta gauza daitezen. Presoak, dagozkien urratsak emanaz, etxera bidea egin dezaten, atera gaitezen bidera!

MOBILIZAZIOAK: 

📆Abenduaren 21ean,

1️⃣Gasteizen · 11:30ean · Ruta Europa hoteletik (N-1, 341.km) – Zaballara
2️⃣Iruñean · 18:00 · Autobus geltoki zaharretik

📆Abenduaren 27an, Bilbon · 19:00 · Bizikidetza Plazan (Isozaki dorreak)

📆Abenduaren 28an, Donostian · 12:00 · bulebarretik #AteraBideraPresoakEtxera


Sare Herritarrak "Motxiladun haurrak. Hezkuntza inklusiboaren ikuspegitik hezkuntza premien inguruko analisi eta proposamenak" unitate didaktikoa aurkeztu du

Sare Herritarrak, Esti Amenabarro eta Marian Bilbatua adituek osatu duten “Motxiladun haurrak. Hezkuntza inklusiboaren ikuspegitik hezkuntza premien inguruko analisi eta proposamenak” unitate didaktikoa aurkeztu du gaur goizean EHUko Donostiako campusean. Inaxio Oiarzabal Sareko bozeramaileak egungo motxiladun haurren datuak* eman eta kokapen labur bat egin ostean, Esti eta Marianek, lan unitate didaktikoaren aurkezpena egin dute.

“Motxiladun haurrak. Hezkuntza inklusiboaren ikuspegitik hezkuntza premien inguruko analisi eta proposamenak” unitate didaktikoa, gurasoak espetxean dituzten haurren errealitatearen inguruko hausnarketa bat da, hezkuntza ikuspegitik osatua. “Gurasoetako bat edo biak espetxean dituzten haurren errealitatea aztertu dugu” eskolaren ikuspegitik. Bi norabidetan, espetxeak eta urruntasunak haur hauei euren eskolatzean eragiten diena aztertuz batetik, eta eskolak erantzunak emateko orduan dituen mugak eta zailtasunak aztertzen saiatuz bestetik.
Esti eta Marianek adierazi dutenez, lan hau “eskolaren ikuspegitik, egoera hau bizi duten haur zein nerabeek ere, eskolaren aldetik zaintza eta arreta zehatza behar dutela uste dugulako egin dugu, bereziki ikuspegi inklusibotik”. Bi aditu hauen esanetan “errealitate eta aniztasun egoera guztiak aintzat hartuko diren eskola espazioak eraiki behar ditugula esaten dugunean, errealitate hau ere kontuan hartu beharra dago”, haur zein nerabe hauek bizi duten egoerak euren eskolaratzean ere eragin zuzena duelako.

Honela, haur zein nerabe hauek espetxe errealitate krudela bizi dute (familia egiturako erreferentziazko pertsonetako bat edo bi, kartzelan egotean) eta honi urruntze politikaren ondorioak erantsi behar zaizkio (bidai luze eta neketsuak, errepidea, arriskua, urruntasuna, beldurra maite dituzten gurasoak ikusi ahal izateko, antsietatea…). Amenabarro eta Bilbatuaren ustetan “honek guztiak eragina dauka eskolan eta eskolak ezin dio muzin egin honi”.

Orokorrean, gai hau nahiko ikusezina izan ohi da, baita hezkuntza eremuan ere. Eskolak, “denei tokia egin behar dien filosofiari lotuta” egotea beharrezkoa da, eta hau eskolan lan egiten duten profesionalak gai honen inguruan “kontzientzia hartzea”, haien ikasleen errealitateari erantzunak emateko, “ezinbestekoa” da.

Gai honekin kezkatuta, ikuspegi kualitatiboa erabiliz, errealitate hau haien geletan bizi izan duten “irakasleekin lan bat egin dugu” (sakoneko elkarrizketak eginez) eta irakasleen ikuspegitik gai honi dagokionean zein nolako kezkak eta hutsuneak agertzen diren aztertzen saiatu dira. Txosten honetan “horiek jasotzen saiatu gara, etorkizunari begirako lerro eta ikerketa eremu berriak finkatzeko”.

Bi ondorio nabarmendu dituzte, lehena, gai hau lantzeko unean irakasleen aldetik formakuntza gabezia eta prestakuntza espezifikoaren beharra, eta bigarrena, ikasgelan lantzeko baliabideen beharra, material didaktikoena, alegia.

* MOTXILADUN HAURREN DATUAK: Egun bost haur bizi dira euren amekin espetxean: lau haur Picassenten, Valentzian (Xua, Haitz, Hilargi eta Izadi) eta bat Aranjuezen (Irati). Zentzu honetan, Inaxio Oiarzabal Sareko bozeramaileak Irati eta bere ama Aranjuezen bakartuak izatea salatu du, gainontzekoekin bateratzeko beharrizana azpimarratuz. Bestalde, 18 urte arteko 104 motxiladun haur-nerabe daude oraindik ere; eta beste bi bidean. Horietatik 13k aita eta ama kartzelan dituzte, 6k ama eta 85k aita.


SARE Herritarraren oharra Arantza Zulueta presoaren leku aldatzea dela eta

Arantza Zulueta abokatu presoa, Zaballako kartzelatik Picassentera (Balentzia) kartzelara mugitu dute. Gertaera hau, Espetxe politika krudel honen mendekuaren beste ondorio bat da.

 

Gogorarazi nahi dugu, bai Arantza eta baita Jon ere, 11/13 makroepaiketan izan direla zigortuak, eta geratzen zitzaizkien bost hilabeteko zigorra betetzeko sartu zituzten Zaballako kartzelan.

Espainiar gobernuak, biderik ulertezinena hartu du. Zigorra betetzeko, beraien senideengandik ehunka kilometrotara urruntzea, zigorra betetzeko soilik 4 hilabete geratzen zaien honetan.

Espainiar Gobernuari, hainbeste sufrikario eragiten duen espetxe politika honi amaiera emateko eskatzen diogu. Soilik horrenbeste sufrikario bizitzen ari diren senideei areagotzen bait diete zigorra. Arantza Zulueta Balentziara eramatean pertsona gehiagoren bizia arriskuan jartzen da berriz ere. Arantzaren senideek 500kmtik gora egin beharko dituzte astebururo (500km joan eta 500km itzulian) neguko eguraldiei aurre eginez. Nori egiten dio mesede horrek? Zergatik jarraitzen du Espainiar Gobernuak iraganeko politika honekin? Soilik erantzun bakarra datorkigu burura, mendekua.

Euskal jendarteari, adi egoteko eta mobilizatzeko deia egiten diogu, giza eskubideen defentsa guztion ardura delako.

Horregatik, SAREk, datorren asteazkenean, azaroak 13, arratsaldeko 19:00etan Bilboko Udaletxe aurrean burutuko dugun elkarretaratzera dei egiten du.

 


Ehundaka pertsona batu dira Gasteizen Jose Angel Otxoa de Eribe azkena izan behar duela exijitzeko

Jose Angel Otxoa de Eribe, Estatuko botereen estatistiketan, preso egon eta gaixotasun larri bat dela eta kaleratua izan zena.

Jendarte honen zati gero eta garrantzitsuago batentzat, Jose Angel bere etxean hil zedin aske utzi zuten euskal preso bat da. Ez zuten askatu bere gaitz larria espetxeko hormetatik at artatu ahal izateko. EZ. Ez zuten bere gaitzari aurre egin eta bizia luzatzeko askatu. EZ. Askatasuna, bere bizi esperantzak ia hutsalak zirenean baino ez zioten eman.

Gobernu honek bere egin du PPko Gobernuak bere garaian onartu zuen zirkularra; bertan, ondorengoa jasotzen zen larriki gaixo dauden presoen zegokionean “soilik heriotza ate joka dutela ziurtatzean” izango direla askatuak.

Guztiz krudela da, baina egun oraindik ere errealitate bat izaten jarraitzen du; bada hau baino zerbait zitalagorik?

Salatu nahi dugu, beste behin ere, saihestu zitekeen heriotza bat. Salatu nahi dugu ere, Jose Angelen moduan, hainbat euskal preso daudela, sendaezinak diren gaixotasunekin, euren bizia eskuetatik ihesi doakiela ikusten duten bitartean, espetxean, Gobernu espainiarraren eta Justiziaren pasibitatearen aurrean. Horren adibide da, Ibon Fernandez Iradiren kasua, beste behin ere, justiziak bere gaitzaren gaineko erabakia ebazteko epea luzatu baitu, bere egoeraren larritasuna aintzat hartu gabe, bere etxeratze prozesua eternizatuz.

Jose Angelek eta bere sendiak, gaixotasunaren gora beherez gain, urruntze politikak dakarren sufrimendu atxikiari egin behar izan diote aurre urte luzeetan zehar, mendeku bikoitza jasanez.

Ekin diezaiogun elkarrekin egoera hau aldatzeko. Atera gaitezen kalera, atera gaitezen bidera, zerrenda ilun hau zabaldu ez dadin. Eta batez ere, egin dezagun posible dena eta ezinezko dena, pertsona hauek espetxea atzean utzi eta euren gaitza etxean era duinean artatzeko aukera izan arte.

Bere burua demokratikotzat duen jendarte batek, ezin du elkarbizitzarako espazioen sorrera, gorrotoa eta mendekua oinarri dituen espetxe politika batengatik aldatu.
Aspaldidanik, espetxeak inpunitate eta zigor eremu dira.

Osasunerako eskubidea, oinarrizko eskubidea da, baina baita eskubide unibertsala ere eta errespetatua izan behar da, pertsona preso egon ala ez.

Eta osasunerako eskubide hau, larriki gaixo diren presoen kasuan, espetxearekin bateraezina da.

Tribunalek ezarritako zigorrak, askatasuna ukatzen die presoei, baina ezin die osasunerako eta, are gutxiago bizitzarako eskubidea ukatu.

Jendarte hau euskal presoen aurka ezartzen den gorroto eta mendekuarekin amaitzeko prest dago. Aurrera egiteko prest gaude.

Gorrotoari eta mendekuari ateak itxi eta askatasunari, konponbideari eta elkarbizitzari ateak zabaldu nahi dizkiogu.

Lanean jarraitzeko dei egiten dizuegu. Gure herri, auzo, ikastola, unibertsitate edota frabriketan...

Eta berriro ere kalera aterako gara, beharrezkoa den bitartean.

Marisol, Asier, Garazi... ez zaudete bakarrik. Zuen herriaren maitasuna eta babes osoa duzue.

Gobernu espainiarrari azken deialdi bat eginez amaitu nahi dugu:

GIZATASUNAGATIK, DUINTASUNAGATIK, ETA LEGALITATEAGATIK, LARRIKI GAIXO DIREN PRESOAK ASKATU!

ETXEAN NAHI DITUGU ETA BIZIRIK NAHI DITUGU.